SudaMediCa, The Sudanese Medical Community

السلام عليكم زملائي وزميلاتي
لو سمحتم عايزة اهل الخبرة يدلوني
الزول مننا لحد ما يتخرج من الجامعة بكون متشجع ع القراية
وبقدر يقعد ليها غير انو ذهنه بكون صافي ومركز
ولما يتخرج ويتعصر في الامتياز
والخدمة وممكن يشتغل شوية
لما يقرر يمتحن ببقى زي الزول الداخل المدرسه يادوب
بتهجى.. وبتهرب من القراية .. وبحفظ وبنسى
وبحس انو مجبوووور
ومعصوووور
بدون مايقرا حاجة!!!
انا عاوزة امتحن ان شاءالله OG1
يا الامتحنو .... واي شي
بديتو كيف؟
وواظبتو ع القراية كيف؟

وعليكم السلااااااام ايمو ,, كلامك صح و الله ,, القراية للتخصص حاااااااارة و ياها القراية أم دق ,, السبب الاساسي لضياع الزمن هو البرامج الاجتماعية و النت ,, لو انت برة السودان معناها الله عتقك من لفحة التوب و فلانة عرسوها و فلانة عيانة و فلانة ماتت ,, تربطى نصك و تتحزمى و تقعدى فى الواااااااااااطة و تعملى جدول كاااااااااااااااااااارب و تقري . أول أيام بتحسي بى روحك طاااشة و مسطحة و المعدل بطئ ,, بس ده بيستفزك لانك تقري زيادة لانه احساس التسطيحة ما حلو .
الحاجة التانية لو عاوزة تمتحنى فى شهر معين مثلا طوالى تسجلى اول ما التسجيل يفتح عشان الزمن بيكون مضغوط و دفع القروش بيحرقك ههههههه
نحن ناس باطنية ساي ,, خلى الاوبسنجية يجوك يوروك تقري شنو و من وين .
و ربنا يوفقك و يسعدك دنيا و آخرة ,, و ادعو لينا معاك

ختر الله خيرك
واكثر من امثاااااالك
بس الصبر ...
وسبحان الذي لاينسانا ولا ينساكم

السلام عليكم...فعلا القراية حاااااارة جمر..بس نصيحتي لكل الممتحنين يركزو علي امتحانات الخواجات لأنها مرتبة وفير جدا
..موش زي امتحانات ناس كدا....بس منافستها حارة وقروشها كتيرة