Page 1 of 1

تخيل

Posted: 21 Mar 2012, 13:29
by Hani
تخيل

صاحب هذه الكلمات ترجل البارحة
Image من حقي أغني .. أغني لشعبي .. ومن حق الشعب عليّ
لا بي إيدك تمنع قلبي .. ولا قلبي كما بايديا
علمني أغني .. الطين .. المطرة .. والطورية
الناس الصابرة .. سنين بالحال .. الما دغرية
القابضة الجمرة في إيدا .. والجمرة تلهلب حية
لا قادرة الجمرة تقيدا .. لا قادرة تولع هيّ
يا قلبي بلاش نستعجل .. يا قلبي شوية شوية
علمني الشوق نترجل.. نستحمل وجع الجية
واصلين الما بتأجل .. اليوم الشمشو قوية
لا القش بيهاب المنجل .. لا الطية .. النار .. الكيه
يا صقر الآه يا ريح .. لا تنفض عش قمرية
من حقو يغني صريح .. ذرية ورا ذرية
من حقي أغني العالم .. إبداع وعلم حرية
إنساني شعوب تنسالم .. تنسالم بي حنية
على نخب الود نتنادم .. لا جنس ولا لونية
لا عرق لا آه نتقادم .. سكتنا بياض النية
مش كلنا جينا من آدم .. ومش آدم ابو البشرية
السجن إذاً يترايم .. نبنيها قلاع ثورية
عقبال الخير يترادم .. والدنيا تمش دغرية
مد كفك يا بني آدم .. حرية سلام حرية

حميد - جرحك غائر بقدر جراح غلابة البلد وبقدر جراح المظلومين وبقدر جرح حرية البلد

انه فقد عظيم
حقه علينا ان نبكيه وأن ندعو له بالرحمة
ذلك الرجل التقي النقي الدرويش الذي حمل هم كل مواطن في أكله نومه وصحيه وصحته وتعليمه
[youtube][/youtube]

Re: تخيل

Posted: 21 Mar 2012, 13:34
by Hani
الحال وراك كيفن تسر باقيلك انتي بلاك في زين
ما تهشم ابريق الرضا خنست نسيمات السمح
والبسمه زي حبه قمح
لفحا وطفر طيرآ كتر
أورث غصافيري الضنى يبس غناها مع الفجر
هطل على الشجر الهموم وشاشات نهارات العنا
عانيت وراك جنس عنا
بوغ سهادي كرو النجوم
خطو المواويل ارتعش
حرس عصاتي بنات نعش
دومست فوق حجر البتول
هلوست بي صلب المسيح
دروش شردت من الضريح
شويمت بي ظلم الحسين
أومت على كم ميضنه
وما بين عيونك والمغول
ساهد بي قافله الحروف
وايقاع ظنابير الزمن
انصربع ايقاع الفصول
هبطت غمامه ورا الجبل
راحت من الليل الجروف
شهقت شعاب انساني خوف منك عليك على أي زول
وك نياق شوقا الضنا سرح عصا التسيار قبل
درب الحياه المرمول فنا
يا وقعة الواقفين هنال يا وقفه الواقعين هنا
يا آفة الوطن الجريح اشمعنى لا وصلك دنا
لا آفه الزمن المشيح قدرت رويحتي تيقنا
من جيتك المرقت بسيم الدهدهك روحت وين
يا زين مرقت مشيتي وين
غربل عليك ليل المدائن الكان زمانك حالا زين
ناشدتها وفتش نهارات القرى المتكيه فوق شعب الصبر
ساندتها علم بطانا الشيطنه
غنيت معاهم سودانا يا سودانا….
للمتهم والدنيا ليل والقمره بت فاتا القطر
وصف لهم حتة شليل
ردد حروفهم ردتها
وقف سحابي مع الدغش شهدتها
شهدت معايا على العذاب الهد أضلاع الغبش راعفتها
تكلت خدودا على بكاي لا قيت سجون جاهد بها
بي جيهة الجذب القديم دخلت مكندك بالشباب خنت التراب راودتها
فوق ها التراب واعدتها
لا انتي جيتي ولا هي آه روحت وين
يا وين مرقت مشيتي وين
كل البنات جو من المللى
هشت بكت شدت حكت وأزيارنا والمرحات خلي
يا انتي يا مرت العدل ماك في صعيدا تترجي
روحت وين قوليلنا بس من الغلبان تجي

لو فينا أطلعي مننا أو بره أدخلى … أدخلى
غنيتك البارح براي انصلبتو التانيين غناي
والليل بتواتاك شعر دونو انعتاقك أو فناي
هيا يا مغنين الشعر..ضد ها الزمان وطبنجتو
شعر الشعر…شعر أيوه يلا علينا جاي
ونكر المغني كمنجتو
نادوس يا فجر القصائد اندلق
ما حك جلدك مثل ظفرك فأنطلق
انا شرحنا لك صدرك أو شرخنا فأنعتق
يا أنت يا كل الذين لأجل خاطرهم طهوت غداه عقم زهور كلم لتنفتق
غضبآ يؤرق موقديه كورته
رجمآ لكل من تنازل أو تخاذل
أو تشاعر أو تداعر
أو تهاون أو تخاون أو تعاون ضد فتحك أو أتاني ليسترق
تربت يداك…تبت يدا كل الذين تغامزوا
وتهامزو وتلامزو وتقززو وتلذذو
من فيه جرحك يا وطن
نادوس أه … نادوس يا………
أمسينا يا نادوس وأصبحنا بيك يا أم
يا سوسه ضد السوس قلبآ بلاك يضم
ليل الضياع مهووس يحلم هواك يؤم
بعض الحصاد الروس عالم نداهو بعم
ختيت هواك فانوس بقالي شلتو وحم
جيت المدن باخوس لاقيتو جالب السم
راشح هجير البوس وكل الوجود دم دم
كوركت يا نادوس أم الغبش يا أم
يا نخل يا أبنوس يا سامبا يا تم تم
يالبيك غناي محروس دخري الغلابه هلم
دهمني كم مجروس وعكمت تاني وقم
حمرت في السحب المكبرته
يا دخان يا ريحه يا قواده للبحر المخنس والعساكر والملمس..ما تختشى
بيوضه يا ماخده الخريف ما طمبرت عربانا شي
مستني في الزمن النزيف القال بجي وفات بي وشي
رشت النهار بالصبر أبت المغارب تترشي
دقست سواقي المتعبين كايسالا فيها عقاب عشي
بيوضه آه أواه لو الكلمات حصى
قالت لي الله أقرب فرج
أواه لو الكلمات لهب نرجم به وش زمن القسا
قالت في اطن الليل وهج هدام أمان الناس نسي
دنقرت للأرض السربله بالسراب فرغت بي غلبي العوج
فقدت أيادي العصا شديت حزامات الجلد تالا ضرا الواطه
كوركت صد أرجع يا ولد
طوريه أبوك تراها دي عاند كواريك مشيت طوريه أبويا نراها ديك
لفحوها لمن قام يصلي خطاب بكارات الغمام مغرب صباح ليله دخلتو على البلد
حرق عرق الفي الكلام عطشان سقيت عرق الشديره من المطيره الفي كان حس
العساكر لا ورا قالت لي أجر شدره غنايا جريك ضرايا جريك ضرا قبل العساكر ما
تصل قبل الدرادر ما تبين وكانوا العساكر في وشي قت أقول وقع طينه الجداول
ما ها زي طينه جسارتك يا بلد والكل طين
يا نبوت دقه تفوت و لا حلم يموت
النندق نندق نندق ويفضل باقي لهيب الحق
حق الناس ينزل في الحلق
او ينعارض شوكه حوت
يا كهنوت اليجي كابروت
يا جبوت اليجي كابروت
يا كابروت يا كابروت يا كابروت
كابروت عشم وطن الغلابا الحال بلاك تب ما يسر
ما بان صباح أو عسعست قدامنا ليله تزيدنا ضر
أوتارنا يا آخر الغنا حردان عشياتا النغم
فرغت مجالسنا البلاك عنكب على أبوابنا السأم
أنزح كفانا كضب رياح وبكاء رعود وضحك برق
العشب مالي حشا الأراضي جواهو لمن العش حرق
الشعب حي بس كيفت تصد يملابك المليون عرق
كدبنا في الثرى في رجالك ما فينا زولآ ما عرق
ساوين عصا الأشواق مرق
عربان ونوبا نهاتي بيك والزنج تتمناك عتق
ورا يا وجع هيا يا طلق
صد لي ملامحك يا حراز ريح العوارض غربت
فرتق ضفايرك في الرذاذ جية العصافير قربت
لاقيتا في غابه مدينتي وسط شتيلة حبحبت
على عش صغارا الدوب حبت
ما وقف الليل ولا الهجير كم جفت ريقآ وورتبت
لاقت من العنت الكتير ملت الفيافي أحد أحد
فايده جناحى بلا أطير الموت ولا العيشه النكد
با نيل مدد
يا غيث مدد
ندى دمر نادوس ونشوغا
وخلى الناس الصبحت يوم من حيات الخور ملدوغه
خلى الصوت الكبتو الجوع يلقى براحو يضوع ويضوع
الصوت العالي يا صوت الناس التحت الواطى ما مسموع

Re: تخيل

Posted: 21 Mar 2012, 13:47
by Hani
تستغرب يا رسول الله
يا أول وتاني الخلفاء
تستغرب يا أبذر لو جيت
في هذا الزمن الجهجاه
لو فيكم حد يا حنفاء
إتجاسر وقال ما معناه:
(في الدين الطيب لا إكراه)
وبني آدم أدرى بدنياه
أو أن العالم شركاء
في الكلاء ..النار ... وفي الماء
أو حاول ينصح وينطاول
لي حاكم ظالم وقال لا
يا لاقى جهنم مأواه
فتحولو ترابيس شالا
يا راجع نفسه أقلاه
السيف فوق رأسو مخاواة
بالذات الزيك يا أب ذر
بالذات الزيك لو جاء
راكب دغريتو العرجاء
دايماً غلباوي وغالاط
لخباط للعيشة الخمجاء
بالذات الزيك لو جاء
في زمن الزيف المنشر
والتشريعات العوجاء
يا إنباع يا راجي الراجا
يا واقف فوق عمق الدين
يا شايف لي آخر دنياه
يا طيب ... يا إبن الغبراء
الشركة يسارك يا أب ذر
من إسمك واللا من الذر
الكسحت ديكا كريسيدا
داك سيدا أب دقنا شمطاء
وجيب إيدك يلا النيلين
لو درت تشوف العنقاء
يا صاحب النفس الأمارة
بالوعي الديني المحتارة
دا الدين ... المقلعة ده الدين
والمزرعة من فضل الله
سال سيفك داقش شقيش
قدامك عاين كم ديش
الزمن إندقش دقيش
الأمن .. محاكم التفتيش
في كل المدن العربية
حا تلاقي شدرتك مسبية
يا إنتحرت بي بترودين
وعصفورك منزوع الريش
أجلاف كنزوها بلايين
والناس بي الله ويا آمين
بتحلحل دين الكنتين
تنلفت كايس لي مين
الأمن ... محاكم التفتيش
وأصحابك جوة زنازين
وأسيافن صقروا ما فيش
ما إنبعنا وباعتنا قريش
ولأمريكا وبي حبة عيش
والحاكم قبض البقشيش
سال سيفك داقش شقيش
الأمن ... محاكم التفتيش
جنسيتك...بظبورتك...الفيش
في كل المدن العربية
حا تلاقي النفس العربية
في مصحة أمراض عصبية
بين الحجبات والأرتيل
تنململ شاحبة وصفراء
وقافلاها متاريس الديش
والكضبة عمايل الأمراء
سال سيفك داقش شقيش
إتراجع يا أبن الغبراء
يا صاحب النفس الأمارة
بالثورة القادرة الجبارة
إتراجع وأنسى الفقرا
أمثال العسكر غدارة
زراعك تنفد تتنفض
عمالك منك تتجارى
وكل الكادحين الشرفاء
وراح تفضل وحدك في الدارة
راح تفضل وحدك في البر
لا زوجة لا قطة ولا غطاء
لا تكتل نفس يا أب ذر
سيب خونة مكة وتجارا
إتراجع يا إبن الغبراء
في لجة انكسرت بي السارة
زلقتني عجالة الشعراء
فلقتني من الربذة حجارة
سرقتني بدمي الصحراء
أب ذر لا سمعني ولا تبعني
طبطب على همي بيسراه
وكان دمي إنماذج بدماه
بي دم الغبش الشهداء
من اول وتاني الخلفاء
إتجمع في رسول الله
زي نهر بيحفر مجراه
مصلوب فوق عتب الفيحاء
مجلوب في السوق السوداء
وما صرخت بنت أبي بكر
وا إسلاماه ... وا إسلاماه
كانت هي الأخرى وراء القصر
تنململ بين الدهماء
تجار الدين الساقطين
الجنرالات الجبناء
مكتوفة الأرجل والأيدي
مكفوفة الأعين عمياء

Re: تخيل

Posted: 21 Mar 2012, 13:48
by Hani
خوفي من تلحق رفيقك
يا بريق نجم الحيارى
وإنت لا نّور طريقك
لا شرق فجر السهارى
من زمن يا صحوة طلعك
غصة في حلق الصحارى
حتى شال النمة فرعك
دودى زي وهج البشارة
قلنا يا سعد المواسم
عودك المليان جسارة
عودك الفجري المصادم
بالبصيرات والبصارى
مستحيل يرضخ يساوم
مهما كان الريح حصارا
يفضل النخل البقاوم
في السقوط نخل الفقارى
يااندلاع صوت الغفاري
في حلق دغش الغلابا
لو خريفك تاني يطرح
آه يا اخر سحابة
لمايا شرف المواكب
يبقى هم الناس إمارة
تندحر كل المناصب
ينكسر كرسي الوزراة
كنتو وين وين إنتو كنتو
كنتو وين
لما الشوارع ما ثبت قداما مرتق
نفضّت صمت المسافة
مّدت الشوق المضارع
للصباحات التجرتق
كف شهيدا البق مارق
من فرقة الظلمة فجرًا
تم بي دموّ الشرافة وضم حضن الارض عاشق
كنتو وين وين انتو كنتو
لما كان في سجنو ثائر
بي جلابة السونكي نومتو
ويصحى بي امر العساكر
قومتو في الزنزانة يمحى
ويفتح الاف الحناجر
ت.. الاطفال ويكتب انبل الاشعار لباكر
تشطب السجان وصوتو ويبقى فنانا البساسق
كنتو وين . وين انتو كنتو
لما فضل الدين عباية
تربي فوق كتف الغنايا
تنتصب في الجو طوابق
تنقلب في التو بنوكة
للبداهن
والبنافق
والبوافق
لما كان نفس العبايا
تتنفخ بي قدرةحبلا
لي قصار عمر الكحايا
من جُنب تنسلا سيفًا
عبّر السواهو سارق
شدة الفقر الخرافي
حدة الشغل اللي مافي
رُغم الاف المتاجر
والخوازيق والمرافق
كنتو وين انتو كتو
لما البيوت في الشمال قامت خنادق
بالكتابات البتنزل فوق ضهاريهم
مطارق
لما طلاب الحقيقة كانو بختارو المشانق
ولما لسة الله بموت في الجنوب
بين البنادق
كنتو وين وين انتو كنتو
آه يا وطني المستف
في المطارات القصية
آه يا كفني المنتف
في مدارات القضية
آه يا صمتي المكتف في العبارات الندية
آهي يا نفسي الملطف بالنهارات الصبية
آهٍ من رفع المصاحف بالرماح الاجنبية
المعاطف اجنبية
العواطف اجنبية
الجلاليب اجنبية
الدولايب اجنبية
الدهاليز اجنبية
السراير اجنبية
المساير اجنبية
صبة الكآس اجنبية
ختت الراس اجنبية
رشة الدلكة اجنبية
رعشة الفركة اجنبية
طفية النور اجنبية
والخوازيق
عربية
عربية
عربية
فضي نارك يا محارب
ولا هات البندقية
غني عشقك يا صبية
احنا قدامك مدارك
غني للوطن المفارق
عشت يا وطني المبرق
بالندى ولون المشارق
يامحرق
يامحرّق
يا مجرب
عشت بي شرف البنادق
ويسقط
العفن ال بتلب فوقنا من شُرف الفنادق
يسقط
يسقط
يسقط

Re: تخيل

Posted: 23 Mar 2012, 01:13
by Hani
من حقي أغني لشعبي بصوت الراحل المقيم الخالد محمد الحسن سالم حميد [html]<marquee direction="Up" scrollAmount="1"><mcg /><br><mcl /><FONT size="5" COLOR="Blue"><mcg /><br>من حقي أغني لشعبي .. ومن حق الشعب عليا<br><br>من حقي أغني لشعبي .. ومن حق الشعب عليا<br><br>لا بي إيدك تمنع قلبي .. ولا قلبي كمان بإيديا<br> <br>علمني أغني الطين .. المخرطة والطورية<br> <br>الناس الصابرة سنين .. بالحالة الما دغرية<br> <br>القابضة الجمرة في إيدا .. والجمرة تلهلب حية<br> <br>لا قادرة الجمرة تقيدا .. ولا دايرة تولع هيّا<br> <br>يا قلبي بلاش نستعجل .. في الدرب شوية شوية<br> <br>واصلين الما بتأجل .. اليوم الشمشو قوية<br> <br>علمنا الشوق نترجل .. ونستحمل وجع الجية<br> <br>لا القش بيهاب المنجل .. ولا الطبو النار الكيه<br> <br>يا صقر الآفة يا ريح .. لا تنفض عش قمرية<br> <br>من حقو يغني صريح .. ذرية ورا ذرية<br> <br>ومن حقي أغني العالم .. إبداع وعلم حرية<br> <br>إنساني شعوب تتسالم .. تنكالم بي حنية<br> <br>على نخب الود نتنادم .. لا جنس ولا لونية<br> <br>لا عِرق لا آه نتقادم .. سكتنا بياض النية<br> <br>مش كلنا جينا من آدم .. موش آدم ابو البشرية<br> <br>السجن إذاً يترايم .. نبنيها قلاع ثورية<br> <br>وعقبان الخير يترادم .. والدنيا تمش دغرية<br> <br>مد كفك يا بني آدم .. حرية سلام حرية<br><mcl /></FONT><mcg /><br><mcl /></marquee><mcg /><br><br><mcl /><object height="65" width="50%"><mcg /> <mcl /><param name="movie" value="https://player.soundcloud.com/player.sw ... true"><mcg /><mcl /></param><mcg /> <mcl /><param name="allowscriptaccess" value="always"><mcg /><mcl /></param><mcg /> <mcl /><embed allowscriptaccess="always" height="65" src="https://player.soundcloud.com/player.sw ... t_url=true" type="application/x-shockwave-flash" width="50%"><mcg /><mcl /></embed><mcg /> <mcl /></object><mcg /> <mcl /><span><mcg />[/html]

Re: تخيل

Posted: 22 May 2012, 13:52
by M. I. T.
اشتقناك يا حميد


Re: تخيل

Posted: 22 May 2012, 18:51
by Hani
ياخي مالك علينا والله لسه الدمع ما جف من هذا الفقد الجلل ImageImageImageImageImageImageImageImage يا الله، هذ الرجل أهلك مقلتي وأشح مدامعي من كثر ما ذرفت عليه


شوف القدال قال فوق اخوه شنو


Re: تخيل

Posted: 24 Aug 2012, 03:09
by Sheimaa Nasreldein
نسأل الله له الرحمة و المغفرة و لكل مبدعى السودان
السنة دى فقدنا كتير من مبدعي و عظماء السودان ربنا يرحمهم و يغفر ليهم